|
Bildiyiniz kimi Malayziya Baş
nazirinin departamentində nazir Məhəmməd Nəzri
Əbdüləziz fevralın 14-də Bakıda səfərdə olmuşdur.
İlk olaraq cənab nazir və onu müşayiət edən şəxslər
fevralın 14-də Fəxri xiyabana gəldilər. Burada
qonaqları Milli Məclis Aparatının rəhbəri Səfa
Mirzəyev, Azərbaycan-Malayziya parlamentlərarası
əlaqələr üzrə işçi qrupunun rəhbəri Fuad Muradov
və digər rəsmi şəxslər qarşıladılar.
Qonaqlar Azərbaycan xalqının ümummilli lideri
Heydər Əliyevin məzarı önünə gül-çiçək dəstələri
düzdülər, ulu öndərin xatirəsini dərin ehtiramla
yad etdilər.
Sonra malayziyalı qonaqlar Şəhidlər xiyabanına
gələrək, Azərbaycanın suverenliyi və ərazi bütövlüyü
uğrunda şəhid olmuş qəhrəman Vətən oğullarının
məzarları üstünə tər qərənfillər düzdülər. Qonaqlara
Şəhidlər xiyabanının tarixi, 20 Yanvar, Xocalı
faciələri və Dağlıq Qarabağ münaqişəsi barədə
ətraflı məlumat verildi.
Daha sonra ölkəmizdə səfərdə olan Malayziya naziri
Məhəmməd Nəzri Əbdüləziz və onu müşayiət edən
nümayəndə heyəti Milli Məclisdə olmuşlar. Onlar
parlamentin iclas salonu ilə tanışlıqdan sonra
Milli Məclis Aparatının rəhbəri Səfa Mirzəyevlə
görüşmüşlər.
Səfa Mirzəyev qonaqlara Azərbaycanın dövlətçilik
tarixi, müstəqillik uğrunda mübarizəsi, qazanılan
uğurlar, yeni Konstitusiyası, qanunverici orqanın
fəaliyyəti barədə ətraflı məlumat vermişdir. Bildirilmişdir
ki, Azərbaycan müstəqilliyini bərpa etdikdən sonra
dünyanın bir çox ölkələri, o cümlədən Malayziya
ilə əlaqələrin inkişafına xüsusi diqqət yetirir.
Hazırda Milli Məclisdə 60-a yaxın ölkə ilə parlamentlərarası
əlaqələr üzrə işçi qrupları vardır və Azərbaycan-Malayziya
parlamentlərarası əlaqələr üzrə işçi qrupunun
rəhbəri də 29 saylı Səbail seçgi dairəsindən millət
vəkili seçilmiş cənab Fuad Muradovdur.
Məhəmməd Nəzri Əbdüləziz onlara göstərilən qonaqpərvərliyə
və ətraflı məlumata görə minnətdarlıq edərək demişdir
ki, Malayziya hökumətinin parlamentin işi üzrə
naziri kimi Azərbaycana səfərindən məqsəd iki
ölkənin qanunverici orqanları arasında əlaqələrin
inkişafına dair fikir mübadiləsi aparmaqdır. Azərbaycan
həm siyasi, həm də iqtisadi cəhətdən sürətlə inkişaf
edir, İslam Konfransı Təşkilatında xüsusi fəallığı
ilə seçilir. Biz bu ölkə ilə münasibətlərin genişlənməsində
maraqlıyıq.
Azərbaycan-Malayziya parlamentlərarası əlaqələr
üzrə işçi qrupunun rəhbəri millət vəkili Fuad
Muradovun da iştirak etdiyi görüşdə parlamentlərarası
əlaqələrin, iqtisadi, siyasi, mədəni sahələrdə
münasibətlərin dərinləşməsi və digər məsələlər
ətrafında geniş fikir mübadiləsi aparılmışdır.
Əlaqələrin inkişafı üçün qarşılıqlı səfərlərin,
görüşlərin, qanun yaradıcılığı sahəsində fikir
və təcrübə mübadiləsinin vacibliyi xüsusi vurğulanmışdır.
Məhəmməd Nəzri Əbdüləziz xüsusilə vurğulamışdır
ki, onun ölkəsinin hələ idiyədək Ermənistanla
heç bir əlaqəsi olmamışdır və Malaziya bütün məsələlərdə
yalnız Azərbaycanı dəstəkləməkdədir.
|
