Fuad Muradov: “Azərbaycanda
fəaliyyət göstərən qeyri-ənənəvi, radikal
dini icmalara əsasən gənclər cəlb olunur”
[18 sentyabr 2008]
Azərbaycanda fəaliyyət göstərən qeyri-ənənəvi,
radikal dini icmalara əsasən gənclər cəlb olunur.
Bu barədə açıqlamanı SİA-ya müsahibəsində Azərbaycan
Gənclər Təşkilatları Milli Şurasının sədri, millət
vəkili Fuad Muradov verib. “Gənclərin belə zərərli
yerlərdən çəkindirilməsi üçün təmsil etdiyim qurum
bir sıra tədbirlər həyata keçirməyi nəzərdə tutub.
Gənclər arasında radikal dini icmaların təbliğat
aparması mənfi tendensiyalarla nəticələnə bilər”,
- deyən F.Muradov bəzən həmin gənclərin imkansızlıq
ucbatından bu icmalara sövq etdiyini bildirib.
F.Muradov hədəf seçilən gənclər arasında onlarla
maddi imkanı yüksək olanların da olduğunu vurğulayıb.
Onun sözlərinə görə, Azərbaycanın ruhani qurumları
və hüquq-mühafizə orqanları sözügedən məsələ ilə
əlaqədar fəaliyyəti aktivləşdirməlidir. “Çünki
həmin radikal dini icmalar gənclərlə özlərinə
sərf edən şəkildə işlərini qururlar. Rəhbərlik
etdiyim gənclər təşkilatı bu ildən təlim kurslarına
başlayacaq”,-deyən F.Muradov gənclərin bu sektalara
yönəlməsi, onların əsl İslamdan xəbərsiz olmasından
irəli gəldiyini nəzərə çatdırıb. F.Muradov Milli
Şura tərəfindən təlim kursları ilə yanaşı, kitab
və broşuraların nəşr etdirib, gənclər arasında
yaylması ilə bağlı da işlər görüləcəyini söyləyib.
Onun sözlərinə görə, bütün bunlar gənclərin qismən
də olsa, həmin dini icmaların tələsinə düşməsindən
xilas edə biləcək.
160 saylı məktəbdə Ümumdünya İnsan Haqları Bəyannaməsinin 60 illiyinə
həsr olunmuş tədbir keçirilib
Bakı. Kəmalə Quliyeva-APA. Bu gün
Səbayel rayonundakı 160 saylı məktəbdə Ümumdünya İnsan Haqları Bəyannaməsinin
60 illiyinə həsr olunmuş tədbir keçirilib. APA-nın məlumatına görə,
Səbayel rayon İcra Hakimiyyətinin Azərbaycan Hüquqşünaslar Konfederasiyası
ilə birgə keçirdiyi konfransa Milli Məclisin Hüquq siyasəti və dövlət
quruculuğu daimi komissiyasının sədri Əli Hüseynov, millət vəkili
Fuad Muradov və Ombudsman Aparatının əməkdaşları qatılıblar. Millət
vəkili Fuad Muradov bildirib ki, Bəyannamənin 60 illiyi münasibətilə
Səbayel rayonunda silsilə tədbirlər keçirilir. Bu tədbirlərə Təhsil
Nazirliyi və Bakı Şəhəri üzrə Təhsil İdarəsi də dəstək verib. Millət
vəkilinin sözlərinə görə, artıq rayonun bir neçə məktəbində belə
tədbirlər keçirilib: “Biz istəyirik ki, uşaqlar insan haqları bəyannaməsini
bilsinlər və gələcəkdə öz hüquqlarını bilən vətəndaşlar kimi yetişsinlər.
Biz bu prosesə Səbayel rayonundan başladıq. İstərdik ki, digər rayonlar
da bu aksiyalara qoşulsunlar”. Tədbirin sonunda məktəblilərin ifasında
bəyannamənin müddəaları və insan haqlarına dair şerlər səsləndirilib.
Milli Məclisin üzvü Fuad
Muradov İspaniyaya səfər edəcək 18:24 / 03.10.2008 Noyabrın 22-24-i tarixlərində
Madrid şəhərində Avropa Gənclər Təşkilatlarının konfransı keçiriləcək.
Tədbirdə iştirak etmək məqsədi ilə Milli Məclisin üzvü Fuad Muradov
İspaniyaya səfər edəcək. Bu barədə məlumatı SİA-ya F.Muradov özü
verib. Konfransda gənclərlə bağlı bir sıra məsələlər müzakirə olunacaq.
Qeyd edək ki, F.Muradov oktyabrın 5-də isə Belçikanın paytaxtı Brussel
şəhərinə səfərə gedəcək.
