Xocalı Soyqırımının qurbanları Strasburqda anılmışdır

Milli Məclisin deputatı Fuad Muradov Xocalı soyqırımının 19-cu ildönümü ilə əlaqədar silsilə tədbirlərə iştirak etmək üçün 23-17 fevral 2011-ci il tarixdə Fransanın Strasburq şəhərində səfərdə olmuşdur. 

Heydər Əliyev Fondunun dəstəyi və Azərbaycanın Avropa Şurası (AŞ) yanında daimi nümayəndəliyinin təşkilatçılığı ilə fevralın 25-də Strasburqdakı Avropa Parlamentlər Assosiasiyasının binasında ölkəmizin və türk diaspor təşkilatlarının, tələbələrimizin, yerli və xarici qurumların nümayəndələrinin iştirakı ilə XX əsrin ən dəhşətli faciələrindən biri - Xocalı soyqırımının 19-cu ildönümünə həsr olunmuş anma mərasimi keçirilmişdir. Mərasim iştirakçıları erməni vəhşiliyinin qurbanı olmuş xocalılıların xatirəsini bir dəqiqəlik sükutla yad etmişlər. Mərasimə toplaşanlara Xocalı soyqırımının, eləcə də Ermənistan-Azərbaycan, Dağlıq Qarabağ münaqişəsinin tarixinə dair Heydər Əliyev Fondu tərəfindən müxtəlif dillərdə nəşr edilmiş əyani və videomateriallar təqdim olunmuş, ermənilərin xalqımıza qarşı törətdikləri cinayətlər haqqında ətraflı məlumat verilmişdir. Tədbir boyu Xocalı soyqırımına dair fotostend və "Trend" informasiya agentliyi tərəfindən çəkilmiş "Sözün bitdiyi zaman" filmi nümayiş etdirilmişdir. Bundan əlavə, mərasim iştirakçılarına Heydər Əliyev Fondunun vitse-prezidenti Leyla xanım Əliyeva tərəfindən irəli sürülmüş "Xocalıya ədalət" beynəlxalq kampaniya haqqında məlumat verilmişdir. Tədbirdə Milli Məclisin deputatı Fuad Muradov hökumətinin bu məsələni daim gündəmdə saxladığını, beynəlxalq ictimaiyyətin bu hadisələrə düzgün və obyektiv qiymət verməsi istiqamətində ciddi iş apardığını bildirmiş, bu işdə xaricdə təhsil alan azərbaycanlı tələbələrin də əhəmiyyətli rol oynaya biləcəklərini diqqətə çəkərək qeyd etmişlər ki, bu gün Azərbaycanın qarşısında duran əsas məsələ torpaqlarımızın işğaldan azad edilməsi və ərazi bütövlüyümüzün bərpasıdır. Qanlı faciə ilə bağlı nümayəndəliyin hazırladığı mətbuat açıqlamaları Avropa Şurası Katibliyi, üzv ölkələrin nümayəndəlikləri və Strasburqda fəaliyyət göstərən konsulluqlar arasında paylanmışdır. Məlumatda bildirilir ki, Xocalı faciəsinə dair həqiqətləri Fransa ictimaiyyətinə çatdırmaq məqsədi ilə daimi nümayəndəlik tərəfindən "Elzasın son xəbərləri" qəzetində Xocalı soyqırımının 19-cu ildönümünə həsr olunmuş məqalə çap edilmişdir. Mərasimin sonunda ehsan verilmişdir. 

Fuad Muradov Azərbaycanlıların və digər Türkdilli Xalqların Əməkdaşlıq Mərkəzinin (ATXƏM-in) Strasburqda fəaliyyət göstərən “Azərbaycan Evi” ilə birgə təşkil etdiyi, Fransadakı Türk diaspor təşkilatlarının geniş dəstəyi ilə həyata keçirilmiş bir sıra görüş və anma mərasimlərində iştirak etmişdir.

 

Azərbaycan nümayəndə heyətinin üzvləri Avropa Şurasının mərkəzi qərargahında Avropa Şurası İnsan Haqqları üzrə komissarının köməkçisi Bojana Urumova ile görüşüblər. Görüşdə nümayəndə heyətinin üzvləri B.Urumova Dağlıq Qarabağ probleminin mahiyyəti, bir milyondan artıq qaçqın və məcburi köçkünün üzləşdiyi problemlər və onların pozulmuş insan hüquqlarını, eyni zamanda 1992-ci il fevralın 26-da Xocalıda törədilmiş soyqırımla bağlı ətraflı məlumat veriblər. Nümayəndə heyətinin üzvləri Avropa Şurası İnsan Haqqları üzrə komissardan bu məsələ ilə bağlı prinsipial mövqe tutmağı və Azərbaycanın haqq işinin müdafiə olunmasını xahiş ediblər. Görüşdə Avropa Şurası İnsan Haqqları üzrə komissarın köməkçisi xanım B. Urumova komissarla birlikdə Azərbaycana növbəti dəfə səfər edəcəyini və bu məsələdə daima obyektiv olacağını bildirib. Xanın B. Urumovaya Dağlıq Qarabağ problemini və Xocalı soyqırımını tanıdan geniş məlumat və materiallar təqdim olunub.